Dapat na gid karon nga padasigon sang Bids and Awards Committee ukon BAC ang pagbakal sang anum ka mga patrol cars para sa operasyon sang Bacolod City Police Office ukon BCPO.
Suno kay Councilor El Cid Familiaran, Chair sang Committee on Security and Police Matters, nga halos malapit na sa isa ka tuig ang request sang kapulisan sa pagbakal sang salakyan apang tubtub karon wala pa ini matigayon. Personal nga gin-follow-up ni Familiaran sa BAC ang pending request kag iya natukiban nga may “change order” sa pagbakal tungod ang gusto sang syudad nga dekalidad ang pagabaklon nga mapuslan nga operasyon. Gin-ako ni Familiaran nga apektado na ang mobilisasyon sang kapulisan tungod ini pa nga mga patrol cars ang ila ginahulat. Base sa ginhimo nga Invitation to Bid sang Bids and Awards Committee, and presyo sang mga patrol cars and nagalab-ot sa 3.5 milyones pesos. Madumduman nga sang bulan sang Febrero, nagsulod ang request for new patrol cars apang liwat naman nga nagdihon sang Invitation to Bid ang BAC. Sa pihak nga bahin, naga-apelar si Familiaran sa tanan nga mga Mall Management sang syudad nga magdihon sang Security Plan tungod manug-abot na ang bulan sang Disyembre. Gintumod ni Familiaran and mga security agencies nga naga-deploy sang mga security personnel sa tagsa ka mga mall. Ini agud nga malikawan ang pagluntad sang mga kinawatay sa mga shoppers nga magadagsa naman sa mga Mall kag iban pa nga mga Department Stores. Sang damlag pa, nagpatigayon sang inspection ang Firearms, Explosives, Security Agencies and Guard Section ukon FESAGS sa tanan nga mga mall kag may nakita ini nga bayolasyon. Ginkonfirmar ni Familiaran nga sa ginhimo nga inspection, isa diri nga naka-komiter sang bayolasyon kag ginpa-idalum ini sa “reprimand”. Naga-apelar man si Familiaran nga pasangkaron ang “police visibility” sa maabot nga Christmas Season. Magic Eye Brigada News
0 Comments
Leave a Reply. |
Categories
All
|